إزاي أعرف أنا برفيكشونست (ساعي وراء الكمال) أو لا؟
هناك بعض الصفات ، إذا كنت بتعاني من بعضها ، فأنت فيك من البرفيكشونيزم (السعي وراء الكمال) ومحتاج لها إعادة توجيه.
أولا: كل شيء أو لا شيء (all or none thinking)
يعني مافيش شيء غير الكمال يرضيني، وأي شيء أقل من الكمال بالنسبة لي فشل.
الإنسان المتفوق في حياته بيجتهد في الظروف المتاحة ليه، وبيرضى بالنجاح اللي بيوصله حتى لو ما وصلش لهدفه الأساسي اللي كان بيطمح إليه.
ثانيا: النقد
الساعي وراء الكمال ناقد من الدرجة الأولى، بينقد نفسه، والآخرين ، وبينقد كل شيء يشوفه.
عينه بتقع على العيوب والأخطاء، وما بيقدرش يشوف أي شيء بعدها، بالنسبة له حكمت المحكمة والقضية انتهت.
ثالثا: الخوف هو الحافز
إيه اللي بيدفعك لتحقيق أحلامك؟ يا ترى هي رغبتك الحقيقية في الوصول لهدفك؟ ولا خوفك من الفشل؟
تفرق كتير….لأن لو كان الدافع هو الخوف من عدم تحقيق الهدف، مش هتستمتع برحلتك أثناء سعيك لهدفك، وكل إنجاز هتحققه في الطريق مش هتشعر بالسعادة لأنك حبيس الخوف لحد ما تحقق هدفك الوحيد….البعيد.
رابعا: المعايير الصارمة
لو حاطط لنفسك طموحات بعيدة وأهداف صعبة، ومأجل شعورك بالسعادة لما تبقى تحققها، يبقى عمرك ما هتكون سعيد.
حط أهداف معقولة وطموحات منطقية، واستمتع وانبسط إنك بتحققها …بل كمان ممكن تسبقها.
خامسا: التركيز على النتيجة النهائية
في ناس بتكون سعيدة بمجرد السعي ومجرد إنها ماشية في الطريق الصحيح والاتجاه اللي هيوصلها للنجاح.
لو إنت مش فارق معاك إنك بتتعلم وتنمو وتتطور أثناء رحلتك في الحياة، ومش بتعد كل الحاجات دي على إنها إنجازات، ومستني الإنجاز العظيم اللي هتحققه في النهاية….خلي بالك من البرفيكشونيزم.
