يعني إيه لايف كوتش؟

يعني إيه لايف كوتش؟ وإيه الفرق بين اللايف كوتش والمعالج النفسي؟

هو مدرب فن الحياة بيشترك مع المعالج النفسي في تقديم المساعدة (للعميل).

-عميل؟

أيوه طبعا الإنسان اللي بيحتاج كوتشنج هو فعلا إنسان طبيعي جدا محتاج خدمة معينه، عشان كده هو عميل مش مريض.

طيب لما هو مش مريض بيساعده في إيه بقى

أقولك بيساعده في إيه، بص بقى يا سيدي:

اللايف كوتش بيساعد أى حد وممكن يساعدك أنت كمان في تحقيق أهدافك في الحياة، ولو مش قادر تحدد إيه هي أهدافك هيساعدك في تحديدها والتركيز عليها.

اللايف كوتش بيساعدك في رسم خطة لحياتك، عشان تعيش فيها مبسوط ومرتاح البال والضمير.

الكوتش بيساعدك توازن بين مسؤولياتك وبين حقوق نفسك، وإنك ما تنساش سعادتك وسط زحمة الحياة.

الكوتش بيعلمك طرق مجربة ومعتمده علميا كوسائل لإسعاد نفسك وإنعاش روحك حتى لا تكون فريسة للإكتئاب والمرض النفسي.

المدرب بيساعدك في كل ماهو في حدود الآن أو في المستقبل لأن الماضي مالناش سلطة عليه.

الكوتش بيساعدك تحط إيدك على عيوب الإدراك عندك واللي بتتسبب في أنماط تفكير خاطئة وسلوكيات مش سليمة.

الكوتش بيساعدك تكون مدرب نفسك وعندك كل الأدوات والطرق اللي تساعد بيها نفسك في أى موقف يواجهك بعد كده.

مدربك عن طريق العلم هيساعدك تكون إنسان أفضل بنفسية سليمة وفكر سليم