في المقال السابق( ادمان السوشيال ميديا 1) اتعرفنا على المشكلة وبدأنا أول خطوة في حلها، قبل ما نتكلم عن الخطوة التانيه ،في واحد ممكن يتسائل:

طب ليه مهم اننا نتحكم في حياتنا و المعلومات اللي داخله دماغنا و مشاعرنا؟ما تخلي اللي يدخل يدخل و احنا خسرانين حاجه؟

للاسف اه خسرانين كتير، والسبب ان المعلومات اللي داخله دي بتتحول لافكار والأفكار دي بتتحول لكلمات ومشاعر والكلمات والمشاعر دي بتتحول لأفعال والأفعال دي بتتحول لسلوك وعادات بتشكل شخصيه حضرتك.

 

وفي الآخر بتلاقي نفسك واحد تاني بتصدر منك تصرفات عمرك ما كنت تتصور انها تخرج منك، مش قالو زمان “الزن عالودان أمر من السحر” و هو ده زن الودان بتاع الزمان ده ولون من ألوان السحر اللي بيسيطر عالعقول ويخليك شارد مشغول، افكار متضاربة، اخبار من كل مكان، ومن كل شكل ولون، موجات واخداك ومش عارف رايحه بيك علي فين.

 

وفي الأصل أنت لا تملك إصلاح  ولا تعديل الا اللي بين ايديك، اللي انت مسؤول عنه، حياتك اللي ربنا وهبهالك لهدف معين عاوزه منك ولغايه انت مشغول عنها وبتجري ورا اوهام،بتضيع عمرك في مالا يسمن ولا يغني.

 

عرفت بقي ليه مهم نتحكم في المعلومات اللي داخله دماغنا وبتشكل وعينا وبتأثر بشكل مباشر علي إدراكنا لاهدافنا والسعي للوصول اليها
طب يلا بينا نكمل رحلتنا ……يتبع إن شاء الله( ادمان السوشيال ميديا: خلي بالك من وعيك)